धोकादायक इमारत पाडताना वादावादी

13

कोल्हापूर : महापालिका प्रशासनाच्यावतीने महाद्वार रोड वांगीबोळ येथील धोकादायक इमारत उतरवताना शुक्रवारी कर्मचारी व भाडेकरु यांच्यामध्ये वादावादीचा प्रसंग उद्भवला. श्रीपाद पंडितराव यांची इमारत कर्मचारी उतरवताना भाडेकरु कारेकर यांनी अंगावर अॅसिड ओतून घेण्याचा प्रयत्न केला. त्यामुळे परिसरात तणावाचे वातावरण निर्माण झाले. पण पोलिस प्रशासन आणि महापालिकेच्या अधिकाऱ्यांनी समजूत काढल्यानंतर त्यांनी नरमाईची भूमिका घेतली. शेवटी पोलिस बंदोबस्तात सुमारे ६० फूट लांबीची इमारत कर्मचाऱ्यांनी जमीनदोस्त केली.

शहरातील धोकादायक इमारतींचा सर्व्हे झाल्यानंतर महापालिका प्रशासनाने इमारतींच्या मिळकतदारांना नोटिसा बजावल्या होत्या. नोटिशीद्वारे धोकादायक इमारती उतरवण्याची सूचना केली होती. त्याला प्रतिसाद न मिळाल्याने प्रशासनाने इमारत उतरवण्याची कारवाई सुरू केली आहे. शुक्रवारी महाद्वार रोड परिसरातील वांगी बोळ येथील पंडितराव यांची धोकादायक इमारत उतरवण्यासाठी शहर अभियंता नेत्रदीप सरनोबत, उपशहर अभियंता एस. के. माने, कनिष्ठ अभियंता निवास पवार यांच्यास सुमारे ६० ते ७० कर्मचारी पोलिस बंदोबस्तात दाखल झाले. इमारत उतरवण्यास मुख्य मिळकदाराने समंती दिल्यानंतर कामाला सुरुवात झाली. मात्र त्याचवेळी भाडेकरु कारेकर यांनी इमारत पाडण्यास मज्जाव केला. त्यामुळे अधिकारी व कर्मचाऱ्यांबरोबर त्यांची वादावादी झाली. या वादावादीमध्ये त्यांनी स्वत:वर अॅसिड ओतून घेण्याचा प्रयत्न केला. पण पोलिसांनी त्यांच्याकडील अॅसिडची बाटली काढून घेतली. यावेळी नागरिकांनी मोठी गर्दी केली होती.

कारेकर यांना प्रशासनातील वरिष्ठ अधिकाऱ्यांनी वस्तुस्थिती समजावून सांगितल्यानंतर त्यांचा विरोध मावळला. त्यानंतर महापालिकेच्या कर्मचाऱ्यांनी सुमारे ६० फूट लांबीची धोकादायक इमारत पाडून टाकली. तब्बल चार तासात इमारतीचा भाग काढून टाकण्यात आला. या प्रभागात आणखी आठ ते दहा धोकादायक इमारती असून त्या इमारतीही पाडल्या जाणार आहेत. ज्या मिळकतदारांना नोटिसा बजावल्या आहेत, त्यांनी स्वत:हून इमारती उतरवून घ्याव्यात, असे आवाहन महापालिकेच्यावतीने केले आहे.